සෙවනගල සීනි කර්මාන්ත ශාලාවේ වැඩිපුර නිෂ්පාදනය කර ඇත්තේ මධ්‍යසාරයි

- ඇමැති ජගත් පුෂ්පකුමාර

ලසිත දුමින්ද

සෙවනගල සීනි කර්මාන්ත ශාලාවේ පාලනාධිකාරිය රටේ අවශ්‍යතාව ඉටු නොකර ඉන් පරිබාහිරව කටයුතු කර ඇතැයි පොල් සංවර්ධන හා ජනතා වතු සංවර්ධන ඇමැති ජගත් පුෂ්පකුමාර මහතා පැවැසීය.

එම කර්මාන්ත ශාලාව පෞද්ගලික අංශයට ලබාදී තිබුණේ රටට අවශ්‍ය සීනි ප්‍රමාණය නිෂ්පාදනය කිරීම සඳහා බවත්, එහෙත් මේ වන විට එහි වැඩිපුරම නිෂ්පාදනය කර ඇත්තේ මධ්‍යසාර බවත් ජගත් පුෂ්පකුමාර මහතා ඊයේ (08 වැනිදා) කොළඹ පිහිටි එම අමාත්‍යංශ ශ්‍රවණාගාරයේ පැවැති ප්‍රවෘත්ති සාකච්ඡාවකදී ප්‍රකාශ කළේය.

2002 වසරේදි එහි ස්‌ප්‍රීතු ලීටර් විසිලක්‍ෂ විසිපන්දහස්‌ අට සියයක්‌ නිෂ්පාදනය කළ බවත්, 2008 වන විට ලීටර් හතළිස්‌තුන් ලක්‍ෂ අසූහත්දහස්‌ දෙසියයක්‌ දක්‌වා වර්ධනය වී තිබෙන බවත් හෙතෙම කීවේය. එහෙත් සීනි මෙටි්‍රක්‌ ටොන් විසිතුන්දහස්‌ තුන්සිය අනූහයක්‌ 2002 වසරේ නිෂ්පාදනය කර තිබෙන බව පෙන්වා දුන් ඇමැතිවරයා 2008 වන විට එකොළොස්‌ලක්‍ෂ හතළිස්‌ තුනක්‌ දක්‌වා සීනි නිෂ්පාදනය පහත වැටී තිබෙන බවත් පැවැසීය. සෙවනගල සීනි කර්මාන්ත ශාලාව රජයට අයත්ව තිබියදී ස්‌ථීර සේවකයන් 750 ක්‌ හා ආදේශක සේවකයන් 1200 ක්‌ සිටි බවත්, වර්තමානයේ ස්‌ථීර සේවකයන් 300 ක්‌ හා ආදේශක සේවකයන් 300 දෙනකුට සීමාවී තිබෙන බවත් හෙතෙම සඳහන් කළේය.

පාඩු ලබන ආයතන රජයට පවරා ගැනීමේ පනතට විපක්‍ෂ නායකවරයා එකඟ වී තිබෙන බවත්, එම පනත පාර්ලිමේන්තුවට ඉදිරිපත් කරන දින රටෙන් බැහැරව ගියේ ඒ නිසා බවත් ජගත් පුෂ්පකුමාර මහතා කීවේය.

සෙවනගල සීනි කර්මාන්ත ශාලාවෙන් රටේ අරමුණ ඉටු වී නොමැති බැවින් ඉදිරියේදී නිසි බලධාරියකු යටතේ එය පාලනය කිරීමට අවශ්‍ය කටයුතු සිදුකරන බවත් ජගත් පුෂ්පකුමාර මහතා වැඩිදුරටත් සඳහන් කළේය.

http://www.divaina.com/2011/11/09/news15.html