සරත් ධර්මසේන
වෙබ් අඩවි 05 කට ශ්‍රී ලංකාවේ පිවිසීම අහුරාලමින් පනවා ඇති තහනම ඉවත් කරන්නැයි ඉල්ලා නිදහස්‌ මාධ්‍ය ව්‍යාපාරය ගොනුකළ මූලික අයිතිවාසිකම් පෙත්සම සලකා බැලීම ශ්‍රේෂ්ඨාධිකරණය විසින් ලබන වර්ෂයේ ජනවාරි 24 ට කල් තබන ලදී.
ආර්. කේ. එස්‌. සුරේස්‌ චන්ද්‍ර සහ සත්‍ය හෙට්‌ටිගේ යන ශ්‍රේෂ්ඨාධිකරණ විනිසුරුවන් හමුවේ ඊයේ මෙම පෙත්සම කැඳවූ අවස්‌ථාවේදී නීතිපති වෙනුවෙන් පෙනී සිටි නියෝජ්‍ය සොලිස්‌ටර් ජනරාල් සවීන්ද්‍ර ප්‍රනාන්දු මහතා පෙත්සමට විරෝධයක්‌ මතු කළ අතර ඔහු කියා සිටියේ පෙත්සම්කරුවන්ට පෙත්සම පවත්වාගෙන යැමට නෛතික අයිතියක්‌ නැති බවයි.
පෙත්සම්කරුවන් තහනමට ලක්‌වී ඇති වෙබ් අඩවිවල අයිතිකරුවන් නොවන බවත් මූලික අයිතිවාසිකම් උල්ලංඝනය කිරීමේ නීති රෙගුලාසි යටතේ සහනයක්‌ ලබාගැනීමේ අයිතියක්‌ නැති බවත් නියෝජ්‍ය සොලිසිටර් ජනරාල්වරයා පැවසීය.
පෙත්සම නැවත කැඳවූ පසුව අදාළ සියලුම පාර්ශ්වවලින් ඉදිරිපත් කෙරෙන කරුණු සලකා බැලීමෙන් පසුව පෙත්සම ගැන විභාගයක්‌ පවත්වනවාද නැද්ද යන්න ගැන තීරණයක්‌ ගන්නා බව විනිසුරු මඬුල්ල සඳහන් කළහ.
නිදහස්‌ මාධ්‍ය ව්‍යාපාරයයේ කැඳවුම්කරු බව කියන සුනිල් ජයසේකර හා සාමාජික උදය කලුපතිරණ මෙහි පෙත්සම්කරුවෝ වෙති.
අධිනීතිඥ ඡේ. සී. වැලිඅමුණ පෙත්සම්කරුවන් වෙනුවෙන් පෙනී සිටි අතර ජනාධිපති නීතිඥ ඩී. එස්‌. ජයසිංහ, විදුලි සංදේශ නියාමක කොමිසම වෙනුවෙන් ද අධිනීතිඥ අනූෂ පැල්පිට වෙනුවෙන් අධිනීතිඥ අලි සබ්රිද පෙනී සිටියේය.
http://www.divaina.com/2011/12/10/news28.html
No comments:
Post a Comment