දැඩි නියඟය නිසා යාල වනෝද්‍යානයේ සත්තු ජලය සොයා හිස්‌ ලූ ලූ අත යති

සංචාරකයන්ගෙන් ලැබෙන ආදායමෙන් හෝ මේ සතුන් වෙනුවෙන් යමක්‌ කරන්න

කතරගම - කේ.ඩී. දේවප්‍රිය

යාල ජාතික වනෝද්‍යානයට මාස කීපයක සිට බලපා ඇති නියඟය හේතුවෙන් වැව් අමුණු රැසක්‌ වියළී ගොස්‌ තිබීම නිසා එහි ජීවත්වන වන සත්තු රැසක්‌ දැඩි පීඩාවකට පත්ව සිටිති.

මැණික්‌ ගඟේ ජලය හැරුණු කොට අන් පිහිටක්‌ නොමැති මෙම වන සතුන් ජලය සොයා යන සිත් කම්පා කරවනු ලබන දර්ශන හා ඡායාරූප පෙළක්‌ කැමරා කාචයේ සටහන් කර ගැනීමට හැකිවිය.

මුවන්, ඌරන්, උරගයන්, අලි ඇතුන් මෙම නියඟයෙන් පීඩා විඳින අයුරු දැක ගැනීමට හැකිවිය. වන සතුන් පෙන්වා විශාල ආදායමක්‌ උපයන වන ජීවී දෙපාර්තමේන්තුව නියං සමයේදී වන සතුන්ට ජලය බීමට හැකි වැව් පද්ධති හෝ කුඩා පොකුණුවත් හදා ඇති බවක්‌ නොපෙනෙන අතර වන සතුන් පෙන්වා ලබන මුදල් වලින් හෝ අසරණ වන සතුන්ට ප්‍රයෝජනවත් දෙයක්‌ සිදු කිරීමට වගකිවයුත්තන්ගේ අවධානය යොමු විය යුතුය.
http://www.divaina.com/2011/10/10/provin03.html