හොරෙන් අලි පැටව් තබාගෙන ඉන්න අය ගැන වහාම තොරතුරු දැනුම් දෙන්න

- ඇමැති එස්‌. එම්. චන්ද්‍රසේන කියයි

අනුර බාලසූරිය

බලපත්‍රයක්‌ නොමැතිව අලි පැටව් රඳවා ගැනීම නීතිවිරෝධී බවත් එවැනි කටයුතු ඇත්නම් ඒ පිළිබඳ තොරතුරු තමා වෙත වහා ලබාදෙන්නැයි ගොවිජන සේවා හා වනජීවී ඇමැති එස්‌. එම්. චන්ද්‍රසේන මහතා පැවැසීය.

කෝට්‌ටේ මාදිවෙල නව සමනළ හෝටලයේදී ඉකුත් 17 වැනිදා පැවැති මාධ්‍ය හමුවේදී ඇමැතිවරයා මේ බැව් සඳහන් කළේය.

නීති විරෝධී ලෙස අලි පැටව් රඳවා ගෙන සිටින බවට තොරතුරු ලැබී ඇති බවත් ඒ සම්බන්ධව ගනු ලබන පියවර මොනවාදැයි මාධ්‍යවේයකු නැගූ ප්‍රශ්නයකට පිළිතුරු දෙමින් ඇමැතිවරයා මේ බව පැවසීය.

එවැනි වැරදි කරන අයට තරා තිරම නොබලා නීතිය ක්‍රියාත්මක කරන බව පැවසූ ඇමැතිවරයා එවැනි පුද්ගලයන් තමා ආරක්‍ෂා නොකරන බවත් පැවැසීය.

ජාතික වනෝද්‍යාන මෙන්ම ඒවායේ වෙසෙන සතුන් ආරක්‍ෂා කිරීම අපගේ වගකීමක්‌ බවත්, මේවා තුළ කිසිදු නීති විරෝධී කටයුත්තකට ඉඩ නොතැබිය යුතු බවත් එවැනි නීති විරෝධී කටයුතු කරන අයට තමාගෙන් කිසිදු සමාවක්‌ නැතැයි ද කීය.

අප රටේ ජාතික වනෝද්‍යාන ජාත්‍යන්තර ප්‍රමිතීන්ට අනුව සකස්‌ කිරීමට සැලසුම් කර ඇති බවත් ප්‍රථමයෙන් එය යාල, බූන්දල අභය භූමිවලින් ආරම්භ කෙරෙන බවත් පැවසීය.

මෙම වනෝද්‍යාන තුළ වෙසෙන සතුන්ට හිරිහැරයක්‌ නොවන අයුරින් ඒවා සකස්‌ කිරීම මෙහි අරමුණ බවද පැවසූ ඇමැතිවරයා සµdරි සඳහා දැනට තිබෙන අබලන් වාහන වෙනුවට ඒවායේ නිරත අයට සහන ක්‍රමයකට නව වාහන ලබාදීම, වනෝද්‍යාන ඇතුළත මාර්ග සකස්‌ කර වේග සීමා ඇති කිරීම යනාදී කටයුතු මෙමගින් සිදු කෙරෙන බවද සඳහන් කළේය.

ජාතික විනෝද්‍යාන තුළින් ලැබූ ආදායම 2009 වසරේදී රුපියල් මිලියන 215 ක්‌ වූ අතර එය 2010 වසරේදී රුපියල් මිලියන 412 ක්‌ දක්‌වාත් 2011 දී රුපියල් මිලියන 545 ක්‌ දක්‌වාත් වර්ධනය කිරීමට හැකිවී ඇතැයි ද වැඩිදුරටත් පැවසීය.

එමෙන්ම 2011 වසරේ මෙරටට පැමිණි විදේශ සංචාරකයන් නව ලක්‍ෂයකට ආසන්න පිරිසෙන් ලක්‍ෂ දෙකකට ආසන්න පිරිසක්‌ වනෝද්‍යාන නැරඹීමට පැමිණ ඇතැයි කී ඇමැතිවරයා මෙමගින් ලැබෙන විදේශ විනිමය තවත් වර්ධනය කර ගැනීමට කටයුතු කරන බව, හොරොව්පතාන, මාදුරුඔය, වෙහෙරගල, රැස්‌වෙහෙර යන ප්‍රදේශවල ඇති කරන අලි සංරක්‍ෂණ මධ්‍යස්‌ථාන වැඩි කිරීම සංචාරක ව්‍යාපාරයට බෙහෙවින් වැදගත්වන බවත් සඳහන් කළේය.

මෙම අලි සංරක්‍ෂණ මධ්‍යස්‌ථාන ඇති කිරීම සඳහා රුපියල් මිලියන 1000 ක මුදලක්‌ මේ වසරට වෙන්කර දී ඇතැයි කී ඇමැතිවරයා මෙම මධ්‍යස්‌ථාන මෙම වසරේදීම ආරම්භ කෙරෙන බව පැවසීය.

මෙමගින් අලි මිනිස්‌ ගැටුම අවම කිරීමට හැකිවනු ඇති බවත් අලින්ගේ වාසස්‌ථාන ක්‍රමයෙන් අඩුවී යැම මෙම ගැටුමට හේතුවී ඇති බවත් අලින් ගම්මානවලට පැමිණීම වැළැක්‌වීමට විදුලි වැටවල්, ජීව වැටවල් ආදිය සකස්‌ කෙරෙන බවත් කීවේය.

සියයට 41 ක්‌ තිබූ වන ගහනයෙන් ඉතිරිව ඇත්තේ සියයට 20 තරම් ප්‍රමාණයක්‌ බවත්. මෙම වනාන්තර ප්‍රමාණය අද සිටින අලි ගහනයට ප්‍රමාණවත් නොවන බවත් මේ තුළින් අලි මිනිස්‌ ගැටුම නිර්මාණය වී ඇති බවත් සඳහන් කළ ඇමැතිවරයා මෙම ගැටුම් අවම කිරීමට හැකි සෑම පියවරක්‌ම ගන්නා බවත් පැවැසීය.

මෙම අවස්‌ථාවට අමාත්‍යාංශ ලේකම් උදේනි වික්‍රමසිංහ, වනජීවී අධ්‍යක්‍ෂ එච්. ඩී. රත්නායක. ගොවිජන සේවා කොමසාරිස්‌ ජනරාල් රවින්ද්‍ර හේවාවිතාරණ, ජාතික පොහොර ලේකම් කාර්යාලයේ අධ්‍යක්‍ෂ රන්ජන් ධර්මවර්ධන යන මහත්වරු සහ අමාත්‍යංශ නිලධාරීන් පිරිසක්‌ එක්‌වූහ.

http://www.divaina.com/2012/01/21/news26.html