පින්නවල අලි පැටව් ජාවාරමක්‌

ප්‍රියදර්ශන ලියනගේ

අලි පැටවුන් සොරකම් කිරීමේ මහා පරිමාණ ජාවාරමක්‌ පින්නවල අලි අනාථාගාරය කේන්ද්‍ර කොට ගෙන සිදුවෙමින් පවතින බව පරිසරවේදී සංජීව චාමිකර මහතා පැවැසීය.

සංජීව චාමිකර මහතා මෙම අදහස්‌ පල කළේ පින්නවල අලි අනාථාගාරයේදී අලි පැටවුන් ව්‍යාපාරිකයන්ට දේශපාලනඥයන්ට සහ ආගමික ස්‌ථානවලට කිසිදු විධිමත් සැලසුමකින් තොරව ලබාදීම නිසා අලින්ට සිදුවී ඇති කරදර පිළිබඳ මාධ්‍ය වෙත කරුණු දැක්‌වීම සඳහා ඉකුත් 18 වැනිදා සවස කොළඹ පැවැති මාධ්‍ය හමුව අමතමිනි.

වැඩිදුරටත් කරුණු දැක්‌වූ සංජීව චාමිකර මහතා පින්නවල අලි අනාථාගාරයේ සිටින අලි පැටවුන් පෞද්ගලික අංශයේ ව්‍යාපාරිකයන්ට ලබාදීම සඳහා රජය ගෙන යන වැඩපිළිවෙළ ජනතාවගේ නාමයෙන් නතර කළ යුතුයි.

මෙම ජාවාරම පිටුපස රජයට සම්බන්ධ දේශපාලනඥයන් ව්‍යාපාරිකයන් සහ ඉහළ පෙළේ නිලධාරීන් රැසක්‌ සිටිනවා. පින්නවල අලි අනාථාගාරය ආරම්භ කළේ 1975 වර්ෂයේදියි. 1985 වර්ෂයේදී තමයි පළමු අලි පැටියා ලෙස සුකුමලි උපන්නේ. එදා සිට අද දක්‌වා අලි පැටවුන් 67 දෙනෙක්‌ පින්නවල අලි අනාථාගාරයෙන් බිහි වෙලා තිබෙනවා. මෙම අලි පැටවුන් අතරින් අලි පැටවු 12 දෙනෙකු 2011 වසර තුළදී පමණක්‌ විවිධ පුද්ගලයන්ට ලබාදී තිබෙනවා. මෙම අලි පැටවූ අද අන්ත අසරණ තත්ත්වයට පත්වෙලා. ඔවුන්ට හරියට කෑම බීම ටිකවත් ලැබෙන්නේ නැහැ.

පරිසර මධ්‍යවේදී නයනක රන්වැල්ල මහතා -

පින්නවල අලි අනාථාගාරයෙන් විවිධ පුද්ගලයන්ට ලබාදී ඇති අලි පැටවුන් පිළිබඳව කිසිදු පසු විපරමක්‌ සිදු වෙන්නේ නැහැ. පින්නවල අලි අනාථාගාරයේ අලි පැටවුන් 67 ක්‌ බිහි වෙන කොට අලි පැටවු 85 දෙනෙක්‌ අලි අනාථාගාරයෙන් හදා වඩා ගැනීම සඳහා පෞද්ගලික අංශයට ලබාදී තිබෙනවා. නමුත් ඔවුන්ට පසුගිය කාලය පුරාම එක අලි පැටියෙක්‌ වත් අලුතෙන් බිහිකර ගන්න බැරි වී තිබෙනවා. එම නිසා මේ ජාවාරම දැන්වන් නතර කළ යුතුයි. දැන් මහ දවල් අලි සොරකරම් කරනවා. නමුත් මේ අයට විරුද්ධව නීතිය ක්‍රියාත්මක වන්නේ නැහැ.
http://www.divaina.com/2012/01/21/provin03.html