බියගම - සුගත් ගුණතිලක
අවිස්සාවේල්ල සීතාවක ආයෝජන ප්රවර්ධන කලාපයේ පිහිටි පෞද්ගලික සමාගමක සේවකයන් 378 දෙනකුගේ සේවය හිටි හැටියේම අවසන් කිරීම හේතුවෙන් ඊට එරෙහිව අවිස්සාවේල්ල මහෙස්ත්රාත් අධිකරණයේ පැවැති දීර්ඝ නඩු විභාගයකින් අනතුරුව සේවකයන් හට හිඟ වැටුප් ලෙස රුපියල් 134253777.00 (දහතුන්කෝටි හතළිස් දෙලක්ෂ පනස් තුන්දහස් හත්සිය හැත්තෑහතක්) සේවකයන් හට ගෙවන ලෙස අවිස්සාවේල්ල මහෙස්ත්රාත් බන්ධුල ගුණරත්න මහතා එම සමාගමේ අධ්යක්ෂ මණ්ඩලයට පසුගිය 09 දා නියෝග කර ඇත.
කිසිදු හේතුවක් නොදක්වා සේවකයන් 378 දෙනෙකුගේ සේවය හදිසියේ අවසන් කිරීම මත අවිස්සාවේල්ල කම්කරු විනිශ්චය සභාව විසින් සේවකයන් 01-06-2004 දින නැවත සේවයෙහි පිහිටුවන ලෙස 31-05-2004 දින කරන ලද නියෝගය කඩ කිරීම හේතුවෙන් එම සමාගමේ අධ්යක්ෂ මණ්ඩලයට එරෙහිව අවිස්සාවේල්ල සහකාර කම්කරු කොමසාරිස් විසින් නඩු අංක 79872 යටතේ අවිස්සාවේල්ල මහෙස්ත්රාත් අධිකරණයේ චෝදනා ගොනු කර තිබිණි.
01-03-2012 දින වග උත්තරකාර සමාගමේ අධ්යක්ෂවරුන් චෝදනාවට වැරදිකරුවන් කරමින් නඩු තීන්දුව ප්රකාශයට පත් කළේය.
1950 අංක 43 දරන කාර්මික ආරවුල් පනතේ 43 (2) උප වගන්තිය ප්රකාරව සේවකයන් සේවයෙහි පිහිටුවීම කළ යුතු වූ 01-06-2004 දින සිට නියෝගය ලබාදුන් 01-03-2012 දින දක්වා හිඟ වැටුප් වශයෙන් රුපියල් 13,42,53777.00 (රුපියල් දහතුන් කෝටි හතළිස් දෙලක්ෂ පනස් තුන්දහස් හත්සිය හැත්තෑ හතක්) සේවකයන් 378 දෙනාට ගෙවන ලෙසද නියෝග කෙරිණි.
හිඟ වැටුප් රුපියල් තිස් ලක්ෂය බැගින් වූ වාරික වලින් ගෙවන ලෙස නියම කළ අතර මූලික වාරිකය ගෙවීම සඳහා 10-04-2012 දිනට නියම කෙරිණි. තවද පනතේ 43 (2) වගන්තියට අනුව වරද කරු කරනු ලැබූ පසු පැහැර හැරීම තවදුරටත් සිදු වුවහොත් දිනකට රුපියල් පනහ බැගින් 01-03-2012 දින සිට 09-03-2012 දක්වා දින 07 කට රුපියල් තුන්සිය පනහ බැගින් අධ්යක්ෂවරුන් දෙදෙනාට රුපියල් හත්සියයක දඩයක් ගෙවීමට මහෙස්ත්රාත්වරයා නියම කළේය.
රජයේ අධිනීතිඥ එන්. රසික් මහතාගේ උපදෙස් පරිදි කම්කරු දෙපාර්තමේන්තුවේ නීති ක්රියා අංශයේ නීති නිලධාරි ප්රියන්ත විදාන පතිරණ මහතා පැමිණිල්ල මෙහෙයවිය.
වග උත්තරකරුවන් වෙනුවෙන් හිටපු නීතිපති සී.ආර්. ද සිල්වා මහතා ප්රමුඛ නීතිඥ පිරිසක් පෙනී සිටියහ.
http://www.divaina.com/2012/03/12/news07.html
No comments:
Post a Comment